Kralendijk, 30 novèmber 2021 – Water- en Energiebedrijf Bonaire N.V. (WEB) ta anunsiá ku e supsidio pa Covid-19 ta terminá.
En konekshon ku e krísis di Corona, gobièrnu di Hulanda a supsidiá e tarifa di uzo fiho pa awa i elektrisidat kompleto. Despues di 8 luna a prolongá esaki te ku un total di 20 luna.
E periodo aki – kaminda e tarifa di uzo fiho a keda pone riba nulo – lo vense denter di poko. WEB ke informá bon na ki momentu esaki lo ta visibel E momentu ku bo ta bai risibí e faktura kaminda e tarifa di uzo fiho no ta supsidiá kompletamente, ta dependé di e tipo di usuario.
Elektrisidat – Konsumidó mayor
E medida di supsidio a bai na vigor pa fakturanan ku un fecha di uzo den aprel 2020. Esaki ta nifiká ku a alkansá e periodo di 20 luna ku e fakturanan ku un fecha di uzo den novèmber 2021.
Na yanüari 2022 lo bo risibí un faktura di uzo pa e periodo di uzo den dezèmber 2021. Lo kobra e tarifa di uzo fiho di akuerdo ku e tabèl di tarifa 2021.
Pa klientenan ku p.e. konekshon di >200 Ampère e tarifa di uzo fiho pa dezèmber 2021 lo subi di $0,- pa $9,63 per kVA.
Elektrisidat – Konsumidó chikitu
E medida di supsidio a bai na vigor for di e fakturanan ku periodo di uzo den aprel 2020. Esaki ta nifiká ku a alkansá e periodo di 20 luna pa fakturanan ku periodo di uzo den novèmber 2021.
Na febrüari 2022 klientenan lo risibí faktura pa e periodo di uzo den dezèmber 2021. Lo kobra e tarifa di uzo fiho di akuerdo ku e tabèl di tarifa 2021.
Pa klientenan ku p.e. un konekshon te ku 3*35 Ampère e tarifa di uzo fiho pa e periodo di uzo den dezèmber 2021 lo subi di $0,- pa $19,26.
E tarifa di e luna aki a ser redusí di $28.95 pa $19,26, dor di un rebaho èkstra for di e supsidio adishonal.
Elektrisidat – Pagabon
E medida (kaminda ku e tarifa di Pagabon a ser poné igual na e tarifa di uzo) a bai na vigor entrante 1 di mei 2020. E medida ta terminá, entrante 31 di dezèmber 2021.
For di 1 di yanüari 2022 e tarifa di Pagabon lo no ta igual na e tarifa di uzo variabel mas.
E diferensia entrante 1 di yanüari 2022 kompará ku e tarifa di uzo variabel ta dependé di e tarifanan 2022 ku ainda mester ser determiná.
Awa di Bebe
E medida a bai na vigor for di e fakturanan ku periodo di uzo den aprel 2020. Esaki ta nifiká ku a alkansá e periodo di 20 luna pa e fakturanan ku periodo di uzo den novèmber 2021.
Na febrüari 2022 lo bo risibí un faktura pa e periodo di uzo den dezèmber 2021. Lo kobra e tarifa di uzo fiho di akuerdo ku e tabèl di tarifa 2021.
Pa klientenan ku p.e. konekshon di ½ inch esaki ta nifiká un adaptashon di e tarifa di uzo fiho di $0,- pa $7,- pa e periodo di uzo den dezèmber.
Tarifanan 2022
E tarifanan 2022 lo keda publiká pa mas tardá fin di dezèmber 2021. E tabèl di tarifanan ta disponibel riba nos wèpsait www.webbonaire.com.
Si bo tin pregunta adishonal, por tuma kontakto ku nos departamentu di servisio na kliente via info@webbonaire.com.
