Kralendijk, 4 novèmber 2022 – Water- en Energiebedrijf Bonaire N.V. (WEB) ta orguyoso ku logro di e titulo máksimo den e torneo di sòftbòl komersial SKAK-PLUS Aruba den fin di siman último. E tim di WEB a sali invikto di tur e partidonan i titulá kampion di e torneo SKAK-Plus Aruba 2022.
Fin di siman ku ta tras di lomba e tim di WEB a partisipá den e torneo di SKAK-Plus Aruba. E torneo a tuma lugá di 26 pa 30 di òktober 2022.
Partidonan
- Djabièrnè 28 di òktober 2022
WEB 9 – ACU 4
- Djasabra 29 di òktober 2022
WEB 4 – Coca Cola 1
WEB 13 – Sulca 2
Semi final
Ku resultado di e partidonan ariba menshoná e tim di WEB a pasa pa semi final. Den semi final WEB a enfrentá e tim di KPA ganando e partido aki 7 pa 0 i asina pasa pa final.
Final
E partido final tabata kontra The New Radiator Curaçao. E tim di WEB a sa di mantené 2 kareda na fabor te final ganando e partido 2 pa 0 i bira kampion di e torneo SKAK Plus Aruba 2022. E hungado Burnaigel Gerly a bai kas ku e premio di “Most Valued Player” di e torneo.
Dia 1 di novèmber 2022 e tim a regresá kas i a keda risibí na aeropuerto di Boneiru pa gerensia, tim di maneho, algun kolega i famia. Gerensia i personal di WEB ta hopi orguyoso ku e logro aki. Trabou duru ta paga. Ban pa mas!