Kralendijk 22 di aprel 2024, – Durante un bishita resien na Boneiru, e delegashon di Ministerio di Asuntunan Ekonómiko i Klima (EZK), bou liderazgo di e Sekretario General, señor Sandor Gaastra, i e Direktor General Relashonnan den Reino, señor Roald Lapperre, a opservá i diskutí pasonan importante den e transishon di energia na Boneiru.
E bishita a inkluí diálogo ku e direktivanan di Water- en Energiebedrijf Bonaire (WEB) i ContourGlobal Bonaire (CGB), enfoká riba e ampliashon di energia renobabel i generashon di energia híbrido.
E delegashon a tene reunion na WEB i a bishitá infrastruktura krusial, inkluyendo SCADA, Hato i Barcadera, kaminda e trabounan ta den pleno desaroyo. Esaki tambe ta e kaso pa e sitio di konstrukshon di e stashon sensor Galileo. Atenshon speshal a bai na e parke solar ku resientemente a keda kompletá i e kompleksidat di realisashon di e parke di turbinanan di bientu ku pronto lo ser mehorá. Esaki no ta un tarea fásil, pero esensial pa e desaroyo di energia duradero riba e isla.
E bishita ta resaltá e dedikashon di tantu e gobièrnu hulandes, WEB, CGB komo tambe e outoridatnan lokal pa e transishon di energia, ku ta krusial pa e poblashon i kresiente aktividat komersial na Boneiru. E kolaborashon entre WEB, CGB i gobièrnu hulandes ta ofresé perspektivanan prometedor pa un futuro duradero.
E resultadonan di e diálogonan aki i proyektonan ta di gran importansia pa Boneiru i lo keda siguí pa mas planifikashon i ehekushon den e periodo di 2024 te 2030. Boneiru ta prepará su mes pa transishonnan signifikante ku no solamente lo tin un impakto positivo riba e komunidat lokal, pero tambe por sirbi komo ehèmpel pa desaroyo duradero den nos region.
