Kralendijk / Bali 27 Mei 2024 – “ E manera Boneiru komo un komunidat chikitu ta traha riba maneho di awa ta un ehèmpel di inspirashon”, segun e moderadó Sra. Grizelda Santos na e pènel di nivel haltu na e di dies Foro Mundial di Awa despues di e presentashon di direktor finansiero di WEB Boneiru, Sra. Joanne Balentien-Nicastia. Sra.Balentien- Nicastia a remplasá e representante speshal di islanan BES, Sr. Edison Rijna, ku no por a biaha pa Bali, Indonesia, debí na su partisipashon na e konferensia di SIDS na Antigua.
E Foro Mundial di Awa , a tuma lugá di 18 pa 25 di mei 2024, a enfoká riba maneho integrá di awa pa asina por garantisá sufisiente awa i fasilidat di sanidat, ofresé siguridat di kuminda i energia, i adaptá na kambio kromátiko ku temporada di sekura prolongá i subida di superfisie di laman di laman. E delegashon Hulandes a bai bou di e liderato di Sra.Meike van Ginneken, komo representante speshal di awa pa Reino Hulandes.
“Den mi presentashon, mi a papia di e desafionan di un isla chikí kaminda nos mester haña solushonnan pa ta outosufisiente den un ambiente isolá. Ya den añanan ’90 ku investigashon di Fondo Mundial pa Naturalesa, e promé paso a tuma lugá ku e instalashon pa prosesá awa di kloaka ku awor WEB ta manehá. Midimentu ta mustrá ku esaki tin un efekto positivo riba e kalidat di awa di laman na kosta, ku ta bon notisia pa e koral i founa marina. Nos ta purifiká awa di kloaka pa awa di irigashon i ta suministrá esaki na hotèlnan pa muha mata i na e servisio di LVV pa produkshon di kuminda lokal.”
Un efekto adishonal ta ku e awa ku WEB ta pòmp for di laman pa produsí awa di bebe ta keda limpi, asina no tin nesesidat pa usa kímiko den e proseso di purifikashon di awa di bebe. Esaki ta nifiká ku e residuo di awa ku ta bai bek laman ta awa di salu puru. “E proseso kompleto ta efisiente, sigur i sostenibel. E siguiente paso ta pa hasi e proseso di produkshon di awa di bebe ainda mas sostenibel dor di subi e demanda di energia di bientu i solar na 70 pa 80% den e añanan benidero.”
Señora Balentien- Nicastia a rekonosé den su presentashon ku tin mas mehorashon posibel den maneho di awa. “E konsepto di Awa Sirkular kaminda awa ta keda usá un kantidat di bes ,mester ta mas konosí. Lo ta benefisioso si nos komo isla ta invertí den espasio pa almasená i retené awa di yobida pa prevení inundashon. E áwaseru tambe ta bon pa mehoramentu di suela i tambe agrikultura. Esaki ta rekerí un sistema di dam ku ta funshoná bon i un maneho pa awa di supsuela.Bon inisiativanan a tuma lugá kaba ku, por ehèmpel, investigashon hasí anteriormente pa e outoridat nan di awa Hulandes i resientemente midimentu di kalidat di awa di supsuela. Tur esaki por keda fortalesé ku kolaborashonnan sólido pa por logra éksito.”
“Kontaktonan importante a ser fortalesé ku organisashon di awa i otro strukturanan pa kompartí konosementu i kolaborá huntu. Tambe mi a atkirí hopi konosementu aki. Por ehèmpel, Arabia Saudita ta usa modelonan i inteligensia artifisial pa koordiná e nesesidat di awa pa uso agríkola i produkshon di awa for di diferente fuente. Mi ta bai hiba tur esaki for di Bali pa sigui traha huntu ku gobièrnu di Boneiru riba un mihó maneho di awa”.
Direktor finansiero di WEB Sra.Joanne Balentien-Nicastia ku representante speshal di awa pa Reino Hulandes Sra. Meike van Ginneken (meimei) i dijkgraaf Sra.Luzette Kroon di Wetterskip Fryslân.
Direktor finansiero di WEB Sra.Joanne Balentien-Nicastia (na e podio 2 for di man drechi) durante e diskushon den pènel.
