KRALENDIJK – 31 yüli 2024 – Water -en Energiebedrijf Bonaire (WEB) i Federashon di Empleadonan di Boneiru (FEDEBON) a yega na un kontrato kolektivo renobá, entrante 1 di yanüari 2024 i te ku 31 di desèmber 2027. A yega na e kontrato aki despues di un periodo di negoshashon entre FEDEBON i WEB. Tur kondishon aprobá awor lo ser introdusí ku forsa retroaktivo. E kontrato kolektivo laboral nobo ta dirigí riba mehorashon di kalidat di bida di empleadonan di WEB.
Un parti importante di e kontrato kolektivo laboral nobo ta ku empleadonan awor tin derechi riba dianan di vakashon despues di nasementu di nan yu. E medida aki ta destiná pa mehorá e balansa entre trabou i bida priva i, en partikular, pa duna tatanan e oportunidat pa ta huntu ku nan yunan resien nasí.
Ademas e kontrato kolektivo laboral ta ofresé dianan liber èkstra pa mayornan pa kuida yunan ku ta malu. E vakashon di kuido di mucha aki ta permití mayornan kumpli ku nan responsabilidatnan pa ku nan famia sin ku esaki ta interferí ku nan labornan.
E kontrato kolektivo laboral nobo ta dirigí riba mehorashon di kalidat di bida di empleadonan di WEB.
Pa kompensá e oumento di kosto di bida na 2024, kada empleado lo risibí un pago di un solo biaha.
Ademas, a keda di akuerdo ku lo hasi investigashon riba e posibel introdukshon di redukshon den oranan di trabou den futuro. E mundu di utilidat ta traha 24 ora pa dia i den un senario di kresementu ku un merkado laboral skars manera Boneiru, mester tuma e tempu nesesario pa evaluá tur faktor debidamente promé ku tuma desishonnan asina.
Gerensia di WEB ta satisfecho ku e kontrato kolektivo laboral aki. E akuerdo aki ta kuadra den WEB su strategia ku ta enfoká riba bienestar i prosperidat di hende, i pa WEB keda un dunadó di trabou atraktivo i kompetitivo riba Boneiru.
Riba e foto: representantenan di WEB i FEDEBON.
