Kralendijk, 10 di sèptèmber 2024 – Ayera nochi alrededor di 10:00 di anochi, un gran parti di Boneiru a keda afektá pa un interupshon di koriente, un asina yamá “Brown Out.” Rincon, Sabadeco i parti di Hato no a keda afektá pa e interupshon.
E sistema di protekshon outomátikamente a deskonektá un di e kabelnan prinsipal ku ta konektá e planta di produkshon na Karpata i WEB . A konsekuensia di esaki e di dos kabel a sufri di sobrekarga.
E tim di Water -en Energiebedrijf Bonaire (WEB) mesora a kuminsá ku e investigashon pa restourá e suministro di koriente for di 10:00 di anochi. Prioridat a wòrdu duná na konektá hospital Mariadal, kaminda a restourá suministro di koriente alrededor di 1:00 mardugá, otro áreanan a sigui despues. Pa 3:00 di mardugá a restourá 90 % di suministro di koriente pa e isla di Boneiru. WEB lo mester hasi investigashon mas profundo promé ku por a re – konektá e 10% restante i a skohe pa implementá un skema di kita i pone koriente (skakel) pa por suministrá koriente bek na e áreanan restante di Lagun, Republiek, Playa Pabou i Antriol Pariba direkshon Lagun.
WEB ta sigui enfoká riba stabilisá e ret. Nos ta pidi diskulpa pa e inkonbeniensia i ta gradisí komunidat pa e pasenshi.
