Kralendijk, 10 Sèptèmber 2024– Despues di un asina yama “Brown Out” na vários áreanan di Boneiru, WEB a logra haña e situashon parsialmente bou di kontrol. E problema ku a surgi no tabata relashoná ku falta di kapasidat di produkshon, sino ku tabata un problema ku a surgi riba un di e dos liñanan di transmishon entre Contour Global Bonaire (CGB) i Water- en Energiebedrijf Bonaire (WEB).
Téknikonan di WEB a traha duru henter madrugá i durante dia pa resolvé e problema ku a enkontrá i restablesé koriente di un manera kontrolá i kouteloso pa gran parti di e isla. Na mes momentu trabounan di inspekshon ta tumando lugá riba e liña afektá.E trabounan aki lo sigui te na momentu ku e trabounan di inspekshon i reparashon terminá riba e liña di transmishon afektá.
Debí na un fayo tékniko ku a surgi durante e proseso di restourashon di koriente, pa 13:40. WEB i CGB mester re-inisiá e suministro na vários áreanan di Boneiru. Durante e fase di transishon aki, WEB su prioridat tabata pa restablesé koriente na Fundashon Mariadal i na servisionan i instalashonnan vital pa 13:45, i despues ku e koutela nesesario na restu di e áreanan ku a keda sin koriente.
Debí na limitashon di kapasidat di transmishon entre e planta di produkshon na Karpata i Kralendijk, lo tin ku apliká un programa di skakel pa awor en adelante te ku próksimo aviso, loke ta nifiká ku sierto áreanan, durante un periodo anunsiá delantá lo ta sin koriente. E programa lo ser komuniká via nos medionan sosial i media lokal.
Na e momentu aki WEB ta pone prioridat na monitoriá e situashon pero ta bai plania un konferensia di prensa pronto . WEB ta pidi pueblo di Boneiru pa hasi uso konsiente di elektrisidat di manera ku por repartí en energia disponibel pa mas kliente ku ta posibel.
