Kralendijk, Boneiru 11 di sèptèmber 2024 – Resientemente Boneiru a hañ’é konfrontá ku mas frekuensia ku interupshonnan di koriente kousá pa un kombinashon di faktor: un oumento grandi inesperá den konsumo di koriente a konsekuensia di kalor ekstremo, i daño na infrastruktura pa motibu di por ehèmpel aktividatnan di konstrukshon eksterno. E oumento inesperá di 15-20% den demanda di koriente a pone un preshon riba e ret di distribushon, loke pa gran parti tabata kousa interupshon.
Kousa di e Interupshonnan
Water -en Energiebedrijf Bonaire (WEB), responsabel pa suministro di energia di Boneiru, a deklará ku e oumento di demanda a surpasá e nivel antisipá di 5%. Aunke WEB a tuma akshonnan kaba den kolaborashon ku Contour Global Bonaire (CGB) pa tin kapasidat di produkshon sufisiente, e kresementu tambe a pone un peso adishonal riba nos ret. Ademas, e problemanan a bira mas intensivo dor di:
- Sobrekarga na un kantidat di kabelnan , prinsipalmente okashoná pa e demanda haltu.
- Korto sirkuito den e suministro di koriente na Hillside i sistemanan di seguridat muchu sensitivo.
- Kabelnan ku outomátikamente ta keda deskonektá pa motibu di sobrekarga.
Akshonnan di WEB i Solushonnan pa término largu
WEB a tuma medidanan inmediato pa restourá e áreanan afektá. A oumentá e kapasidat di produkshon den koperashon ku CGB, i a agregá 5 MW di kapasidat adishonal. A hasi reparashonnan grandi riba kabelnan dañá pero nos ta trahando riba reparashon di un kabel prinsipal di transmishon entre Contour Global ku WEB. Pa añanan kaba a inisiá un restrukturashon di e ret di distribushon pa por akapará e kresementu kontinuo grado riba e isla.
Pa término mas largu, WEB ta trahando riba:
- Ampliashon di e sistema pa digitalisá e kontrol i supervishon di e ret di koriente.
- Ampliashon di e kapasidat di transmishon prinsipal ku ta antisipá di keda kla na yanüari 2025.
- Ekspanshon i modernisashon di e ret di koriente pa akomodá kresementu na Boneiru.
- Mihó kolaborashon ku kontratistanan pa identifiká i atendé daño na infrastruktura mas lihé.
Kiko ta pasa awor?
Aktualmente WEB ta drechando kabelnan dañá den vários área i ta hasiendo inspekshon riba e partinan di e ret ku ta mas kargá. Sistemanan di seguridat tambe ta optimalisá pa prevení ku e sistema ta stòp sin nesesidat. E interupshonnan aktual ta bou di kòntròl, i nos ta antisipá ku stabilidat lo restourá den e próksimo dianan.
Plannan pa Futuro
WEB lo sigui invertí den ekspanshon di energia di bientu i ekspanshon di kapasidat mas aleu, pa asina Boneiru sigui wòrdu suministrá ku energia stabil asta den tempu di konsumo máksimo. WEB ta komprometé na modernisá infrastruktura i traha ku partnernan eksterno pa minimalisá insidentenan den futuro.
Pa mas informashon por tuma kontakto ku WEB na info@webbonaire.com.
