Kralendijk, 12 di sèptèmber 2024 – Trahadornan di Water- en Energiebedrijf Boneiru (WEB) a traha henter anochi pa restablesé suministro di koriente . Manera anunsiá durante e rueda di prensa di 11 di sèptèmber 2024, e ekipo tabata trahando pa lokalisá e kousa di e problema. Ku yudansa di ekipo spesial pa midi, e lugá di e problema a ser identifiká. E problema a ser kousá pa un daño den e konekshon di kabel na Kaya Korona, na altura di Garage Cordia.
Trabou di reparashon
Durante anochi di 11 pa 12 di sèptèmber, pa 01.00 di mardugá, e reparashon a kuminsá. E trabounan pa suminstra Boneiru bek kompletamente ku koriente a sigui durante oranan di mardugá i a kaba tempran den oranan di mainta. Pa 06.00 or di mainta e problema tabata kompletamente resolvé, ku e skema di skakel no tabata nesesario mas.
Investigashon di e kousa
E kousa presis di e daño na e kabel ainda no ta konosí i por a ser kousá pa diferente faktor. E parti dañá di e kabel a wòrdu manda pa investigashon forénsiko pa un büró independiente. Na e momentu aki e situashon ta kontrolá i stabil.
Prevenshon i mehorashon
WEB ta karga su responsabilidat komo kompania di utilidat pa garantisá un suministro di koriente konfiabel riba e isla. WEB ta konsiente di su ròl krusial den bida di tur habitante i negoshi di Boneiru. Pa e motibu aki WEB ta kontinuá invertí den infrastruktura, teknologia, i forma su trahadónan pa prevení problema den futuro i pa solushoná problema aktual.
WEB Boneiru ya a kumpra ekipo ku por detektá daño tempran kabel. E ekipo aki tabata planifiká pa ser instalá komo parti di e renovashon di e ret di WEB Nobo. Manera a informá durante e rueda di prensa, instalashon di un transformadó nobo i instalashon di skakel di alto vòltahe na SCADA, ku WEB ta trahando riba pa e último tres añanan, lo ta kla den yanüari 2025. Na mes momentu, e ekipo nobo pa midi lo keda instalá.
Ademas, WEB a hasi un skaneo grandi di e ret di awa i koriente durante e último aña pa medio di fotografiá digital. E skaneo nan ta yudá pa detektá apnormalidat den komponente, di manera ku por hasi mantenshon praktikamente.
Ekspanshon di e ret
Pa motibu di e kresementu di e isla, un gran parti di e ret lo keda instalá bou di tera. Esaki ta trese adaptashon den ekipo pa midi. WEB tin plan pa kumpra un trùk spesial pa hasi e trabou di midí riba e ret. Na mes momentu WEB lo sigui formá su trahadónan por medio di “WEB Academy”, ku ta yudá nan pa sigui ekspandé nan konosementu i abilidatnan.
Agradesimentu i reakshon riba spekulashon
WEB ta konsiente di e hopi spekulashon ku ta sirkulá riba media sosial. WEB ke klarifiká ku si tabatin algun señal previo di problema den e ret, WEB sigur lo a tuma medidanan apropiá.
WEB ta gradisí tur trahadó ku a hasi esfuerso pa suministrá koriente bek riba Boneiru mas lihé posibel. Ademas, e organisashon ta ekspresá su apresio pa tur hende ku a duna oido na e petishon di e gerensia pa trata e trahadónan ku rèspèt. Un biaha mas WEB pidi su mas sinsero diskulpa pa kualke e inkombeniensia okashoná pa e interupshon aki.
