Kralendijk, 25 sèptèmber 2024 – Alumnonan di skol básiko Strea Briante i Rayo di Solo a tuma resientemente un inisiativa impreshonante pa medio di nan komishon di alumnonan pa mehorá e medio ambiente na nan skol. Den kolaborashon ku nan dosentenan, nan a skibi un karta na direktor di Water- en Energiabedrijf Bonaire (WEB), kaminda nan a ekspresá nan preokupashon tokante di sushi i stof rònt di edifisio di WEB, kaminda aktualmente tin trabou di konstrukshon ku ta kousa molèster pa e skolnan.
Durante un reunion di e komishon di alumnonan, ku ta konsintié di alumnonan di grupo 5 te ku 8 di skol básiko Strea Briante i Rayo di Solo, nan a diskutí ampliamente tokante e kousa i konsekuensianan di e problema aki. E alumnonan, entre 10 i 12 aña di edat, a demostrá nan kompromiso i nan mes a bin ku posibel solushonnan.
Ku hopi entusiasmo, e alumnonan a skibi un karta kaminda nan a ekspresá nan preokupashon di un manera kla i respetuoso. Seguidamente nan a disidí pa entregá e karta personalmente na direktor di WEB. Señor Silberie a tuma tempu pa risibí e delegashon hóben aki i a skucha ku atenshon nan preokupashon. Impreshoná ku e inisiativa di e alumnonan, el a gradisí nan pa nan envolvimentu i el a dialogá ku e muchanan tokante posibel solushonnan.
“Muchanan ta siña dor di hasi. Inkluyendo nan den problema lokal, nos ta stimulá pensamentu krítiko i kooperashon pa un futuro mihó,” segun direktor di WEB Raymond ‘Roy’ Silberie.
Empleadonan di WEB komo kolaboradornan di e proyekto a apresiá e inisiativa i nan a tuma akshon konkreto inmediato pa mehorá e situashon. Nan a pidi diskulpa i nan lo pone mas atenshon pa evitá molèster den futuro.
E inisiativa notabel aki ta demostrá ku hasta muchanan chikí tambe por tin un papel importante den mehorá nan medio ambiente. Dor di buska kontakto direkto ku e persona responsabel i bin ku nan mes solushon, e alumnonan aki a demostrá ku nan ke tin e futuro di Boneiru den nan man. E akshon di e alumnonan ta sirbi komo un ehèmpel di kon nos por manehá problema i solushon riba nos isla.
