Kralendijk, 24 di desèmber 2024 – Water- en Energiebedrijf Bonaire (WEB) ta anunsiá ku e tarifanan entrante promé di yanüari 2025 a keda stipulá i publiká. Debí na un redukshon den e supsidionan di parti di e ministerionan, e gastunan pa elektrisidat i awa di bebe lo oumentá.
Kada aña, e tarifanan ku e produktor por kobra WEB i ku WEB por kobra klientenan ta keda stipulá i publiká pa Outoridat Konsumidó i Merkado (ACM). Na 6 di desèmber 2024, ACM a establesé e tarifanan di kubrimentu di gastu ku WEB por apliká entrante 1 di yanüari 2025 (*).
Pa tene e tarifanan pagabel, WEB ta hasi solisitut pa supsidionan kada aña.
Seguidamente ta integrá e supsidionan den e tarifanan establesé i e tarifanan ta wòrdu determiná pa tur konsumidó.
Polítika modifiká
E Ministerionan a proveé dos tipo di supsidio pa 2024. Ku e promé supsidio, e tarifanan fiho pa koriente a ser supsidiá te na e nivel di Hulanda Oropeo i e tarifanan fiho pa awa di bebe tambe a keda supsidiá na un nivel bou di USD 10 pa luna. E segundo supsidio tabata un fondo adishonal pa mehorá poder di kompra (alivio di pobresa) riba e isla. Pa 2025, e segundo supsidionan lo no ta aplikabel mas, loke ta resultá den supsidionan mas abou i tarifanan fiho mas haltu pa konsumidónan.
Pa elektrisidat, na 2024 (i 2023), e tarifa fiho pa konekshonnan ku kapasidat te ku 3*50 Ampèr a wòrdu supsidiá kompletamente na sero pa Ministerio di Klima i Kresementu Bèrdè (KGG) komo parti di e esfuersonan pa mehorashon di poder di kompra. Na 2025, debí na e polítika nobo, e tarifa fiho lo subi te un nivel komparabel ku Hulanda Oropeo, ku tambe a subi pa motibu di oumento di gastu den Hulanda Oropeo. Pa un kapasidat di konekshon di 3*35 Ampèr, e tarifa lo subi di sero pa USD 43.79 pa luna, i pa un kapasidat di 3*50 Ampèr lo subi di sero pa USD 88.36 pa luna. Pa konekshonnan mas grandi lo apliká un oumento di 7.4%.
Pa awa di bebe, un supsidio adishonal pa alivio di pobresa a permití pa na 2024 e tarifa fiho keda redusí na USD 3.71 pa luna (en bes di USD 8 pa luna). Na 2025, e supsidio adishonal lo no ta disponibel mas, i e supsidio normal lo keda redusí. Pa un konekshon ku un tamaño di ½ dùim, e tarifa fiho lo subi di USD 3.71 pa USD 16.34 pa luna. Pa konekshonnan mas grandi, lo apliká un oumento di 8.7%.
E konsekuensianan di e kambio den polítika a ser presentá i eskalá pa Entidat Públiko Boneiru (OLB), ku despues a dirigí e problema na e outoridatnan na Hulanda. Sinembargo, e esfuersonan no a logra mitigá e efektonan di e kambio di polítika.
Kambio Relevante den Tarifanan:
Tarifanan periódiko di elektrisidat
E tarifa di uso fiho pa konekshonnan ku kapasidat te ku 3*50 Ampèr ta wòrdu fijá riba USD 43.79 pa luna (ántes USD 0.00 pa luna).
E tarifa di uso variabel ta baha di USD 0.3550 pa kWh pa USD 0.3136 pa kWh.
Pa konekshonnan pre-pago (Pagabon), tarifa pa 1 di yanüari 2025 ta fihá riba USD 0.5088 pa kWh. Na 2024, tarifa pa Pagabon tabata mes kos ku e tarifa variabel, USD 0.3550 pa kWh, pa motibu ke e tarifa fiho tabata fihá na sero pa konekshonnan chikí.
Tarifanan periódiko di awa di bebe
E tarifa di uso fiho pa konekshonnan chikí mas komun lo subi di USD 3.71 pa USD 16.34 pa luna.
E tarifa di uso variabel lo baha di USD 4.165 pa m³ pa USD 4.055 pa m³.
Pa e klientenan ku entrega di awa di bebe via di trùk awa, e tarifa lo subi di USD 4.600 pa m³ pa USD 4.928 pa m³.
Fakturashon
E tarifanan nobo pa elektrisidat i awa di bebe lo ta aplikabel riba fakturanan ku periodo di uso ku ta kuminsá na yanüari 2025. Pa klientenan di Pagabon i trùk di awa, e tarifanan lo ta dirèkt visibel for di 1 di yanüari 2025.
(*) Na 1 di yüli 2025 – dependiendo di desaroyonan di gastu di kombustibel – lo bolbe fiha e tarifa di uso variabel i e tarifa pa Pagabon.
Tarifanan di konekshon di un solo biaha pa elektrisidat i awa di bebe
E tarifanan di konekshon di un solo biaha pa konekshonnan chikí te ku 25 meter ta fihá na USD 1,793.95 pa elektrisidat i USD 1,221.38 pa awa di bebe. Esaki ta representá un oumento di 2.5% kompará ku 2024.
