Kralendijk, 25 mart 2025 – Durante un kontrol di prueba, empleadonan di Water- en Energiebedrijf Bonaire (WEB) a deskubrí vários kaso di konekshonnan krusá den vários area na Boneiru. E problema aki por kousa peliger di kontaminashon di e suministro di awa di bebe. WEB ta rekordá su klientenan tokante e riesgonan pa salú di konekshon krusá i ta enfatisá ku e tipo di konekshonnan aki ta prohibí.
Un konekshon krusá ta un konekshon ku no ta safe entre dos diferente fuente di awa, manera e sistema di awa di bebe i un tanki séptiko. Esaki por kousa ku awa di bebe limpi ta bin den kontakto ku awa kontaminá, loke ta trese riesgonan serio pa salú.
Dikon konekshonnan krusá ta peligroso?
Awa di un tanki séptiko ta awa di riol no tratá i por kontené bakteria, vírùs i otro patógenonan dañino. P’esei, nunka konektá un instalashon di awa di bebe na un tanki séptiko!
Aunke ku un konekshon krusá por parse ku e ta un parse un manera fásil pa spar gastu na promé instante, e ta trese riesgonan signifikante pa bo salú. No solamente e awa den bo kas por keda kontaminá, e ret di suministro di awa mas amplio tambe por wòrdu afektá.
Kon un konekshon krusá ta wòrdu kreá?
Den kaso di un konekshon krusá entre un instalashon di awa di bebe i un tanki séptiko, awa kontaminá por drenta e sistema di awa di bebe dor di un proseso yamá “backflow”. Esaki por kontaminá e suministro di awa di bebe i ta forma un riesgo pa salú di e residentenan, ya ku e awa di riol no tratá ta kontaminá e awa di bebe.
Kiko bo por hasi?
Konekshonnan krusá ta estriktamente prohibí. Semper pèrkurá ku instalashonnan di awa di bebe i otro fuentenan di awa, manera tanki séptiko, ta kompletamente separá.
Si bo ke usa awa séptiko pa metanan di irigashon, usa un sistema di drip ku no ta konektá na e liña di awa di bebe, asta ora ku ta hasi uso di un klép di un solo direkshon.
Dor di sigui e konseho aki, bo ta protehá bo mes i bo famia, i mesora ta kontribuí na seguridat di e sistema di awa di bebe pa henter komunidat.
