Kralendijk, 29 di febrüari 2024 – Resientemente Water -en Energieberdijf Bonaire (WEB) a yama bon bini na un delegashon di 15 miembro i 2 staf di komishon fiho di relashonnan den reino di Eerste Kamer der Staten-Generaal (KOREL) pa un bishita di trabou informativo i inspirando.
Na yegada, e senadornan di Eerste Kamer a ser risibí kalurosamente pa sra. Joanne Balentien-Nicastia (CFO) i Gerrit Scharrenberg (COO) di WEB, kende a hasi un presentashon korto tokante e desafionan di WEB i e plannan pa futuro duradero di e kompania. E plannan aki ta suprayá e kompromiso di WEB pa durabilidat i inovashon den suministro di awa i energia na Boneiru. WEB tambe a duna splikashon tokante vários proyekto manera GALILEO i e kolaborashon ku Union Europeo den e programa duradero pa islanan ‘30 for 2030’.
Un punto sobresaliente di e bishita tabata e rekorido guiá pa sr. Gerrit Scharrenberg i sr.Hans Staring (Manager BU- Water), kende a hiba e delegashon den e fasilidatnan di produkshon di awa di WEB.
E delegashon a haña un bista tras di kortina na planta di produkshon di awa, kaminda nan por a opservá e proseso pa konbertí awa salu di laman den awa di bebe. E téknika i efisiensia di e proseso a impreshoná e delegadonan profundamente, mes kos ku e sabor ekselente di e awa.
Komo parti di e inisiativa di WEB pa promové durabilidat, kada delegado a risibí un bòter reusabel yená ku awa di WEB, un gesto simbóliko ku ta enfatisá e importansia di konservashon di awa i konsientisashon ambiental.
E delegashon a ekspresá nan apresio pa e manera ku nan a ser risibí na WEB i e oportunidat di tira un bista riba e hopi aktividatnan di e empresa, en partikular esnan enfoká riba produkshon stabil i duradero di awa di bebe.
