Kralendijk, 23 di ougùstùs 2024 – Resientemente un delegashon di Defensa Hulandes a hasi un bishita di trabou na Water – en Energiebedrijf Bonaire (WEB). E bishita aki tabata den kuadro di fortalesé koperashon i mehorá e akshonnan konhunto durante posibel kalamidat i situashonnan di krísis.
Durante un rekorido na e instalashon di produkshon di awa di WEB Boneiru, representantenan di Defensa Hulandes a kombersá ku e profeshonalnan di awa di e isla. Durante e interkambio aki a duna un splikashon profundo di e prosesonan operashonal i prosedernan di emergensia, ku e meta pa fortalesé mas ainda e konosementu i preparashon di Defensa Hulandes pa situashonnan di emergensia na Boneiru.
Despues di e bishita na WEB Bonaire, e delegashon di WEB a hasi un bishita resíproko na Zr. Ms. Pelikaan. Abordo di e barku di marina, representantenan di WEB a bishitá diferente fasilidat, inkluyendo un planta chikitu di osmosis inverso (RO) pa produsí awa di bebe. E planta aki tin sufisiente kapasidat pa kumpli ku e nesesidatnan básiko di e tripulashon i tambe por kontribuí na asistensia di emergensia durante kalamidat. E rekorido a inkluí kombersashonnan detayá, kon Zr. Ms. Pelikaan por duna sosten den situashonnan di krísis, i tambe e forma spesífiko di asistensia ku Defensa Hulandes por ofresé.
E bishita di trabou aki ta ilustrá e esfuersonan konhunto di Defensa i WEB Boneiru pa garantisá seguridat i kontinuidat di e suministro di awa i energia di e isla. Pa medio di kolaborashon estrecho i preparashon profundo, ámbos partido tin e meta pa por respondé di un manera efisiente i bon kordiná den kaso di kalamidat òf krísis.
