Base di konosementu

WEB te responsabel pa e suministro di awa di bebe limpi i koriente konfiabel na Boneiru. Nos ta kuida bo salú i seguridat konforme proseduranan fiho. Nos ta traha duru na seguridat di suministro, durabilidat i pagabilidat.

Nos responsabilidat ta kaba na bo kashi di koriente. WEB no taresponsabel pa loke ku ta pasa tras di bo porta /parti paden di kas.

Bo mes ta responsabel pa uso saludabel i seif di bo instalashonnan pa awa, awa di berpùt i elektrisidat. Bo mes por hasi hopi tambe pa spar riba awa i koriente. E ta duradero i ta spar bo sèn.

Den e rúbrika aki gustosamente nos ta informá bo tokante bo salú, seguridat i prevenshon di riesgo. Tambe nos ta dunabo tepnan útil.

Hidden

Koriente i siguridat

WEB ta responsabel pa sumistro di koriente seif. Bo mes ta responsabel pa uso di koriente seif.

Importante!
Ta rekomendabel pa laga un instaladó registrá hasi trabounan na bo instalashon elektriko. En todo kaso laga kontrolá trabou ku a ser hasí. Asina bo ta evitá problema isituashonnan peligroso.

E instaladó registrá ta un spesialista ku ta kontrolá i evaluá e trabou di un elèktrishèn òf di bo mes segun e normanan stipulá. Un lista ku instaladónan registrá bo ta haña aki.

Download nos foyeto Siguridat (pdf) òf lesa e tepnan aki bou.

Hidden

Sa kiko bo ta kumpra

Ta traha aparatonan elektróniko mas seif posibel. Nan mester kumpli ku varios stándart internashonal, ero tambe tin aparatonan mas inferior riba merkado.

Sa loke bo ta kumpra!

Tepnan

Paga tinu riba marka di kalidat na momento di kompra: Esaki ta garantisá kòntròl di seguridat dor di un instituto independiente.
Preferiblemente kumpra aparatonan ku waya i stèker di grount. [lenk pa>> Grount] Un stèker di grount tin kòrtá ku strep di metal (sistema Oropeo), òf tin tres punta (sistema Merikano).
Aparatonan ku isolashon dòbel ta mihó, danki na un kapa di isolashon èkstra ku na momentu ku ta defekto, no ta isolá e koriente. E aparatonan aki bo ta rekonosé na un ikono chikitu di dos firkant den otro.

Sa kiko bo ta hasi

Apesar ku bo ta kumpra e mihó aparatonan, kabel, waya, stèker i stòpkòntakt:uso ku deskuido por kondusí na situashonnan insigur. E dosnan mas konosí ta sobrekarga i korto sirkuito. Lástimamente ahinda esaki ta pasa hopi.

Sa kiko bo ta hasi!

Sobrekarga i Korto sirkuito

Sobrekarga ta surgi pa motibu ku muchu aparato elektróniko ta sendé pareu.E wayanan di koriente e momento ei ta bira muchu kayente. E isolashon ta smèlt i okashoná un korto sirkuito.

Korto sirkuito por ser okashoná tambe ora un aparato òf waya ta dañá. E núkleonan di koper di e wayanan di koriente e momento ei ta bin den kontakto ku otro. Esei ta kondusí na un amperahe hopi haltu. E wayanan ta bira kayente i e isolashon ta smèlt.

Den kaso di un korto sirkuito bo ta pèrde koriente den bo kashi di meter. Un fius ta bula, òf e suich di grupo ta bòltu. Den kasonan mas serio e interuptor outomátiko ta bòltu.

Lo bo keda parsialmente òf kompletamente sin koriente te ora ku resolvé e motibu di e korto sirkuito .

Tepnan

Aparatonan

No laga muchu hopi aparato traha pareu. Ta trata di ‘chupachupanan di koriente’ manera wasmashin, èrko, frishidèl, sekadó elektróniko, mashin di laba tayó òf stòfzùiger.
No konektá muchu aparato riba un stòpkòntakt.
No konektá mas ku 1200 Watt pa grupo den bo kashi di koriente. Riba e aparato òf den e instrukshon di uso bo por mira kuantu Watt un aparato ta usa. Si tin duda konsultá ku un instaladó registrá.
Tene bo mes semper na e instrukshon di uso di aparatonan elektróniko.

Stèker i wayanan

Kontrolá e isolashon di e wayanan elektróniko. Hopi biaha e isolashon ta dañá na e stèker. Instalá e stèker di nobo, òf remplasá e aparato.
Semper tene na e stèker ora ku bo ta saké for di stòpkòntakt. No ranka na e waya pa evitá ku ta daña e isolashon.
No laga e wayanan pega, por ehèmpel bou di porta òf tapeit. Sòru tambe pa lòs e wayanan kompletamente i evitá ku nan ta mishi òf bruá den otro. Asina bo ta prevení kentamentu dimas i gastamentu ku ta okashoná korto sirkuito.
Nunka pega waya di koriente ku klabu òf nit. Ta bende klèm òf renchi spesial pa kabel pa pega waya na un manera seif.
No usa waya pa kologá kos na dje.

No usa mas ku un verlengsnoer entre un aparato i stòpkòntakt. Mas tantu waya bo tin, mas grandi e chèns ku nan ta brua den otro. Tambe inkonsientemente bo por konektá muchu aparato si bo kombiná verlengsnoer.

Sòru pa grount

Bon grount ta importante pa bo seguridat. Laga bo instalashon elektróniko grount i laga instalá un interuptir outomátiko den bo kashi di koriente. Preferiblemente kumpra aparatonan ku waya i stèker di grount. Pero kiko presis ta grount?

Tera sirkuito
Grount kiermen ku tin un waya di koriente èkstra ku ta laga e koriente no deseá pasa bai den tera. Ora esei sosodé nos ta papia di e asina yamá ‘tera sirkuito’. Den bo kashi di koriente e koriente ta ser deskonektá. Un fius ta bula òf un swich di grupo òf e interuptor outomátiko ta bòltu.

Mal tempu
Na momentu ku welek dal, bo aparatonan elektróniko por daña. Si bo instalashon elektróniko ta bon di grount, na momento ku welek kai e interuptor outomátiko ta bòltu. E koriente ta ser deskonektá I asina prevení daño.

Aparatonan
Grount ta hopi importante den kaso di aparatonan ku un kaha di metal, manera wasmashin. Si un waya òf stèker gasta òf lòs, e waya di koriente por bin den kontakto ku e metal. E momento ei e aparato ta haña koriente. Tera sirkuito ta prevení esaki: e elektrisidat ta wòrdu deskonektá pa motibu ku den bo kashi di koriente e fius ta bula, òf un swich di grupo òf e interuptor outomátiko ta bòltu.

Tene kuidou!
Si e waya di grount ta lòs òf no tin esaki, bo aparatonan ta keda traha normal. Pesei hopi biaha ta deskubrí e grount defisiente na momentu ku algu bai robe: e koriente no ta bai pero ta pone e aparato bou di tenshon.

Hopi peligroso
Ora un aparato ta bou di tenshon e por okashoná kandela òf koriente por dal e usuario. Esaki ta hopi peligroso. Tambe kòrda ku: humedat ta un bon konduktor di koriente. Pues sea mas kouteloso posibel den lugánan húmedo manera den baño i den kushina.

Protehá bo mes, sòru pa grount!

Tepnan

Laga un instaladó registrá kontrolá òf instalá bo instalashon eléktriko. Instalashon ta enserá tambe konekshon di bo aparato.
Paga tinu ku humedat. No pone kos di bebe òf vas ku flor riba, òf direktamente banda di aparatonan elektróniko.
Preferiblemente usa waya i stèker di grount. Konektá nan solamente ku stòpkòntakt di grount.

Paga tinu!: den lugánan húmedo manera baño i kushina stòpkòntakt i stèker di grount ta obligatorio.

Tene kuenta ku mucha

Mucha ta kurioso i movibel. Esaki ta hasi koriente seif èkstra importante. Ta solamente algun medida tin ku tuma pa prevení aksidente i situashon peligroso: hasi stòpkòntaktnan seif pa mucha, sòru pa waya i stèker ta bon isolá, i skonde wayanan bon òf instalá nan bon.

Tene kuenta ku mucha!

Tepnan

Kumpra stòpkòntakt seif pa mucha. Nan tin tapa pa entrada di e stòpkòntakt. E tapanan aki ta move solamente si bo primi e stèker na tur dos banda mes duru. Pa un adulto esaki ta fasil, pero pa un mucha nò.
Tambe bo por tapa stòpkòntaktnan eksistente. Pa esaki ta bende tapa lòs. Paga tinu: E tapanan pa stòpkòntakt di grount ta diferente i no di grount! Bo ta plak òf primi e tapa den e stòpkòntakt. Pa medio di un mekanismo di fer e burakunan di e stòpkòntakt no ta visibel si bo no ta usa .
Saka stèker for di stòpkòntakt despues di hasi uzo di aparatonan, pa asina e tapanan ta den posishon seif.
Kontrolá e isolashon di waya i stèkernan regularmente. Un mucha no sa kiko ta isolashon malu i inkonsientemente lo kwe un waya tene., poniendo ku koriente por dal’e.
Skonde wayanan di koriente mas tantu posibel. Bo yu por trompeká ariba òf keda pegá aden. Pasa e wayanan kanti muraya i patras di meubelnan.
Preferiblemente usa algu pa pasa e kabel aden. Un otro posibilidat ta pa pega e wayanan ku klèm.
No laga waya kologá na alkanse di mucha: esei ta invitashon pa mishi kuné.

Legionela

Legionela ta un sorto di bakteria ku por kousa un kontaminashon di e awa di bebe. WEB ta hasi tur su esfuerso pa prevení kontaminashon ku legionela. Tambe tin medidanan ku bo mes mester tuma. Legionela ta un asuntu di nos tur.

Download nos foyeto Legionela (pdf). Òf lesa mas informashon aki bou.

Hidden

Kiko ta legionela?

Legionela bo ta haña tur kaminda ku ta húmedo; den tera i awa. Bakterianan di legionela ta mes inevitabel ku tur otro sorto di bakteria. Na Boneiru tin legionela tambe den awa di bebe. E kantidat ta asina chikitu ku e bakteria no ta forma peliger.

Bakteria di legionela ta krese den awa na un temperatura entre 20 i 50 grado Sèlsio (68 i 122 grado Fahrenheit). Tin 14 tipo di bakteria di legionela ku tur por haña den e awa di bebe.

Si e awa para ketu e bakterianan di legionela ta multipliká nan mes hopi lihé. Esei ta sosodé ora tin un asina yamá ‘biofilm’ – un kapa fini di mikro-organismo riba superfisie ku ta den kontakto ku awa.

Kiko ta malesa di legionela?

E bakteria di legionela ta okashoná un pulmonia yamá ‘malesa di veterano’.

E nòmber ta originá di e promé brote rekononosé bou di veteranonan di ehérsito na Estádos Unídos na 1976.

Malesa di veterano mester ser tratá mas lihé posibel ku antibiótika. Tin un forma mas leve tambe, e grip di legionela (kentura di Pontiac). E infekshon aki ta desaroyá meskos ku un grip ‘normal’ i por pasa di su mes sin tratamentu.

Kon hende ta keda infektá?

Infekshon ta sosodé via aerosol, un neblina di drùpel di awa chikitu. Pensa riba un ducha, baño di bùbel, baño di stom òf un fòntein. Via aerosolnan kontaminá ku bo ta inhalá legionela ta drenta den bo via respirashon. E ora ei e por kousa un infekshon. Hende no ta bira malu dor di bebe awa kontaminá. Legionela no por pasa di hende pa hende.

Ken ta kore mas riesgo pa bira malu?

Mayoria hende ku wòrdu infektá ku legionela no ta desaroyá e malesa di veterano. Gruponan ku un riesgo mas haltu pa bira malu ta: hendenan for di edat medio, humadónan, bebedónan pisá i hendenan ku un resistensia abou pa motibu di malesa òf behes.

Kon e malesa ta desaroyá?

E tempu entre infekshon i bira malu ta entre 2 i 18 dia. Síntoman ta doló di kabes, doló di múskulo, kansansio, kentura haltu, tosamentu i falta di rosea. Malesa di veterano mester wòrdu tratá mas lihé posibel ku antibiótika. E forma mas leve, grip di legionela, mayoria biaha ta pasa di su mes.

Kiko ami mes mester hasi pa prevení infekshon di legionela?

No ta eksistí un bakuna pa malesa di veterano. Presta atenshon riba lo siguiente pa limitá e riesgo di legionela:

Mas importante ta pa awa den pipanan i drenahe di edifisionan i hardinnan no para ketu muchu largu. Regla di oro: no mas ku 7 dia.
Sòru pa uso regular di tur kranchi, ducha, wc i eventual sisteman di sprui. Spula bo pipanan di drenahe bon si nan no a wòrdu usá mas ku 7 dia. Laga tur awa Sali for di e slannan di kurá despues di uso.
Limpia baño di bùbel, jacuzzi i humidifikadornan bon segun e instrukshon di uso. Limpia e kalki di duchanan regularmente.
Ahustá bòiler bon: por lo mènos 60 grado Sèlsio (140 grado Fahrenheit).
Un hende ta hasi uso di un aparato di apnea? Kòrda bon ku mester yena e tanki di awa ku awa herebé ku a fria. Mester kambia e awa diariamente. Mesterlimpiá e masker tur dia i etanki tur siman.

Sea alerta! E awa tin un holó straño, un otro koló òf e ta trubel? E ora ei por tin algu robes.

Kiko WEB ta hasi?

Kòntrol kada mei aña
WEB ta obligá pa kontrolá e awa di bebe kada mei aña pa wak si tin legionela. Nos ta kwe mònster di henter e ret di produkshon i distribushon, inkluso e tankinan. E mònsternan di awa ta ser analisá bakteriológikamente i kímikamente. Si enkontra legionela riba e norma di 100 unidat pa liter (100 kve/l) di formashon di kolonia, WEB ta tuma medida. Ta spula i si ta nesesario desinfektá e pipanan. Si entretantu tin sospecha di kontaminashon, lo kontrolá e awa mesora.

Obligashon di notifikashon i di informashon
WEB ta obligá pa lei pa notifiká un kontaminashon na Inspectie Leefomgeving en Transport (IL&T) i abitantenan ku posiblemente ta afektá. Tambe WEB mester konsientisá e komunidat di e peligernan di legionela i informá kon por minimalisá e riesgonan di kontaminashon.

Prevenshon
WEB ta tuma prevenshon na serio. Informashon tokante legionela – i prinsipalmente: prevenshon di infekshon di legionela – nos ta kompartí tambe via un foyeto, nos página di Facebook i mensahenan na radio i televishon. Prevenshon tambe ta un asuntu di nos tur.

Informashon pa kompanianan i institushonnan

Mayoria kompania i institushon tin un instalashon di awa di bebe kolektivo. Esei ta ser usá dor di diferente hende. E doño di un edifisio ta responsabel pa e kalidat di e awa, for di e meter di awa te na e kranchinan di awa. E doño tin un obligashon legal di kuido: e salú di e usuarionan di awa no por ta na peliger.

Análisis di riesgo i plan di maneho
E doñonan di instalashonnan di awa di bebe kolektivo ta legalmente obligá pa tin un análisis di riesgo di legionela i un plan di maneho. Operadónan por elaborá e análisis di riesgo òf e plan di maneho nan mes òf kontratá e instaladó di e instalashon òf un kompania spesialisá.

Toma di mònster i análisis
WEB tin e obligashon pa kada mei aña chèk legionela den e ret di produkshon i distribushon. For di e meter di awa e operadónan mes ta responsabel pa e kalidat di awa den nan ret di tuberia. Pesei WEB ta konsehá pa kada mei aña laga kontrolá instalashonnan di awa pa ku legionela. Bonlab por ehekutá e kòntrol aki.

No drep for di e tanki séptiko

WEB hopi biaha ta konfrontá kontaminashon di awa di bebe debí na konekshon krusá. Esaki ta e konekshon ilegal entre e instalashon di awa di bebe i e tanki séptiko pa drep den kurá. E ta parse un solushon bunita pa spar gastunan, pero ta un riesgo pa bo salu i di otronan!

Gustosamente nos ta splika bo di e riesgonan di salú. Tambe nos ta rekordá bo ku konekshon krusá ta prohibí.

Download nos foyeto Konekshon krusá? Nò! (pdf). Òf lesa e informashon aki bou.

Hidden

Kiko ta un konekshon konekshon krusá

Un konekshon krusá ta e konekshon entre e instalashon di awa di bebe i e tanki séptiko.

Ku esaki awa for di e tanki séptiko porser usá pa drep den kurá, pero e awa for di bo tanki ta awa di kloaka no purifiká. Pues awa di berpùt. Esei ta un peliger pa salubridat públiko.

Wak e animashon tokante Konekshon krusá.

Tin un chèns grandi ku bo ta kousa kontaminashon di awa di bebe. No solamente den bo propio instalashon di awa di bebe, sino tambe den e ret di distribushon di awa. Por surgi un fluho di awa ku ta bini bèk, e asina yamá ‘backflow’,di bo sistema di afvur pa e sistema di awa di bebe.

Kiko ta backflow?

Den dos tubu ku ta konektá ku otro e líkido semper ta bai para mes haltu den tur dos. Ora e nivel (òf e preshon) baha den un tubu – bo tanki séptiko –awa lo kore sali for di e otro tubu – bo instalashon di awa di bebe.

Esei ta eksaktamente e intenshon, tòg? Si, pero lo kontrali ta pasa mes fásil. Sin ku bo ta ripará. E preshon den bo tanki séptiko ta bira mas haltu ku den bo instalashon di awa di bebe. E ora ei awa di kloaka ta kore bai bèk den bo awa di bebe. Esei ta backflow.

Kon backflow ta kousa kontaminashon?

Kon e preshon den bo sistema di afvur por bira mas haltu ku esun di bo sistema di awa di bebe? Tin diferente kousa: diferensia di haltura, uso di pòmp, òf uso intensivo di e afvur. E backflow ku ta surgi ta kontaminá bo awa di bebe.

E kontaminashon aki por yega den e ret di distribushon di awa. Pa motibu ku e preshon den e ret distribushon di awa por ta mas abou ku e preshon den bo instalashon di awa di bebe. Esaki ta sosodé mas frekuente ku bo ta pensa. Diferensia di preshon ta sosodé hopi fásil. Entre otro ora tin trabou di mantenshon, deskonekshon, òf si inesperá mester di hopi awa, por ehèmpel ora di pagamentu di kandela.

Kada konekshon krusá ta un riesgo pa salú!

Kada konekshon entre tanki séptiko i instalashon di awa di bebe ta un riesgo pa salubridat públiko. Pesei segun nos Kondishonnan General 1992 no ta pèrmití konekshon di e instalashon di awa di bebe ku un otro suministro di awa.

WEB ta kontrolá konekshonnan krusá ku tèst arbitrario. Ta deskonektá violadónan i ta duna nan but. Tambe ta kobra nan e gastunan di limpiamentu i eventual gastunan di reparashon i di daño.

Let’s do it together

WEB ta responsabel pa distribushon di awa di bebe limpi na Boneiru. Bo ta asumí bo responsabilidat?

Evitá ku bo ta bira un shushadó: tene bo tanki séptiko i bo instalashon di awa di bebe estriktamente separá. Tene nos awa di bebe limpi, pa bo propio salú i di otro hende!

Spar awa

Bo tabata sa ku pa persona nos ta konsumí mas òf ménos 125 liter di awa di bebe pa dia? Tin diferente manera pa spar awa. Baña un minüt mas kòrtiku ta nifiká mesora 5 meter kúbiko ménos di awa. Esaki ta spar bo hopi dòler pa aña. WC ta usa 30% di nos konsumo di awa total. Un kònòpi di spar riba bo baki di awa di WC ta redusí uso ku mas òf ménos 23 meter kúbiko di awa.

Atendé responsabel ku awa di bebe ta mihó pa medio ambiente. E ta hasi diferensia tambe den bo pòtmòni!

Download nos foyeto Spar (pdf). Òf lesa e informashon aki bou.

Hidden

Tepnan pa den kas

Stèl e flòter di bo wc di tal manera ku e baki di awa no ta yena kompletamente.
Bo no por stèl e flòter? Pone un bòter di 2 liter yená den e baki di awa (no na e banda di e flòter). E baki di e manera akí lo yena ku ménos awa.
Kumpra un hèndel pa bo wc ku ta spar awa.
Paga tinu si bo wc ta sigui kore awa despues ku bo a kaba flùsh. Esaki por kosta mas òf ménos 25 liter pa ora, ku otro palabra 219.000 liter awa pa aña.

Higiena

Hasi uso di un ‘timer’ di ducha. Di e manera aki bo ta konsiente di e tempu ku bo ta tuma pa baña.
Sera e kranchi ora ku ta hunta habon i ta skeiru djente.
Pone un aparato na bo kranchi ku ta limitá e fluho di awa.
Kumpra un kabes di ducha ku ta spar awa.

Laba paña i laba tayó

No laba tiki paña, sino akumulá tur paña shushi. Laba ku un mashin bon yená (pero no di pròp). Usa un labá mas kòrtiku pa paña ku no ta hopi shushi.
Bo ta laba tayó na man? No laba ku awa ku ta keda basha. No spula largu promé i despues.
Bo ta usa un mashin pa laba tayó? E ora ei no tin nodi di spula adelantá na man. E mashin di laba tayó tin un programa pa spula adelantá. Usa e mashin di laba tayó solamente ora e ta yen.

Otro tepnan

Kambia kranchinan ku ta lèk; esakinan ta gasta un promedio di 2000 liter di awa pa aña.
Regularmente kontrolá e meter di awa. Asina bo por ripará na tempu si tin lèkazje den bo instalashon di awa.

Tepnan pa rondó di kas

Spar awa ora bo ta laba outo? Laga e slan para i hasi uso di un èmber. Ku slan fásilmente bo ta usa 150 liter di awa; ku kuater èmber di dies liter tambe por. Bo ke usa un spùit tòg? Hasi uso di un spùit di preshon haltu. Un slan ta usa kasi 3.000 liter di awa pa ora, e spùit di preshon haltu 600 liter pa ora. Ademas bo ta keda kla mas lihé ku un spùit di preshon. Bo ta spar kasi 15% di bo tempu i di awa.
No malgastá áwaseru! Bo por fangu áwaseru den barí òf tankinan di awa supteráneo. Usa esaki pa bo kurá òf eventualmente pa yena pisina.
Un liter di zeta di motor ku a basha abou por daña sigur un mion liter di awa di suela. Pues sea kouteloso ora bo ta traha ku zeta.
Tapa e tera rondó di e matanan ku blachi, sas di palu òf ‘steenslag’, di manera ku e tera por apsorbá e humedat mihó.
Bo ke instalá un pisina? Pensa un momento riba e grandura. Espesialmente den tempu di sekura mester yena e pisina ku awa regularmente.

Spar koriente

Dor di hasi uso di aparatonan eléktriko di manera efisiente, bo por spar riba bo kuenta di koriente konsiderablemente. Asina un famia ku dos yu por spar hopi sèn pa aña dor di laba ku un wasmashin yen enbes di un wasmashin mitar yen. Banda di esei, puntra bo mes ku den nos klima kalor tin nesesidat di sekadó di paña.

Pagá en bes di stand-by
Por spar ku mas kos! Paga mas tantu aparato eléktriko ku ta posibel na lugá di laga nan riba ‘stand-by’. Esaki por redusí uso di koriente konsiderablemente. Por pensa por ehèmpel riba e kargadónan di telefon, telefon di beibi òf skeiru di djente; i riba televishon, kòmpiuter i ekipo di sonido.

Chupachupanan di koriente
Aparatonan ku mester keinta, manera ‘microwave’, wea di koriente pa herebé aros, heru di strika i aparatonan di seka kabei ta hala hopi koriente. Bo tabata sa ku stòfzùiger ta un di e aparatonan ku ta hala mas tantu koriente?

Lampi di spar
Peranan di lus tradishonal, te asina leu, ta usa hopi koriente. Tin kada bes mas i mas lampi di spar. Peranan di lus di LED ta mas ekonómiko ainda. Un pera di lus di LED ta usa 85% ménos koriente kompará ku un pera di lus tradishonall. Ademas nan tin un durashon ku ta 50 bia mas largu.

Nos no por imaginá nos bida mas sin hopi aparato. Pero usanan di forma konsiente no ta kosta hopi esfuerso i e ta skapabu hopi.

Download nos foyeto Spar! (pdf). Òf lesa e tepnan aki bou.

Hidden

Tepnan pa den kas

Frishidèr i frizer

Sòru pa bo frishidèr i frizer ta bon será. Semper sera e portanan mas lihé posibel.
Pone bo frishidèr i frizer na un lugá mas fresku posibel.
Mantené e frishidèr na un temperatura konstante di 4 te 6 grado, e frizer na -18 grado.
Difròs bo frizer regularmente.
Un frishidèr yen ta usa ménos koriente ku un frishidèr bashí.

Tep: yena e frishidèr ku bòternan di awa. Nan ta konservá e friu, di manera ku e frishidèr ta sende ménos. Tambe pa frizer ta konta: yen ta mas ekonómiko ko bashí.

Lus (iluminashon)

Hasi mas uso ku ta posibel di lus natural.
Hasi uso di lampinan ku ta spar koriente, manera lampi di LED òf lampi di spar. No lubidá riba lus di pasku!
Paga lus manera ku bo sali for di un espasio.

Èrko i fèn

Kombiná e uso di èrko i fèn. E fèn ta sòru pa parti aire friu mas optimal.
Skohe pa un èrko ‘inverter’ pa spar energia. Un èrko inverter ta yega na e temperatura deseá kuater biaha mas lihé ku un èrko tradishonal.

Otro aparatonan

Semper strika mas paña pareu. Un heru di strika ta usa mas tantu koriente ora ku e ta keintando.
Ta rekomendabel pa bari kas na lugá di hasi uso di stòfzùiger ku ta gasta masha hopi koriente.
Un stof di gas ta muchu mas ekonómiko ku stof di indukshon, stof kerámiko òf di koriente.

Tepnan pa rondó di kas

Bo tin lus pafó? E ora ei hasi uso di lampi di LED. Si bo instalá un ‘fotocel’ na bo lampinan pafó, e lusnan ta sende i paga outomátikamente ora solo baha i ora solo sali.
Si bo ke spar mas koriente, e ora ei hasi uso di lampinan di LED ku ta sende na momentu ku nan detektá moveshon.
Tuma nota di e uso di koriente ora kumpra bo pòmp di pisina i sistema di drep.
Aparato eléktriko pa usa den kurá ta hala hopi koriente. Por ehèmpel hasi uso di un harpa en bes di un supladó di blachi.

Isolashon

Den kaso di isolashon hopi biaha nos ta pensa riba friu. Pero bon isolashon tambe ta hopi efektivo pa tene kayente pafó di kas i friu paden den kas.

Na momentu di (re)konstrukshon instalá isolashon di muraya i dak. Esaki ta redusí e gastunan di èrko i ventilashon.
Evitá ku e friu di èrko ta sali bai. Pone strep di rùber bou di porta. Kontrolá e seyo di kozeinnan i apliká silikon si esaki ta nesesario.
Glas ku ta resistí kalor ta yuda baha gastu, prinsipalmente den kaso di porta i bentananan grandi.
Ademas e instalashon di glas dòbel ta tene kayente pafó.