Awa di bebe
Ku tin awa ta sali for di kranchi, hopi biaha nos ta haña normal. Fásilmente nos ta lubidá kon importante awa ta den nos bida diario. Sin awa no tin bida. Pa siglonan abitantenan na Boneiru tabata disponé solamente di awa di yobe i awa di pos natural. Na añanan ’60 di siglo pasá tabatin skarsedat di awa; no tabata tin sufisiente awa di pos mas pa e poblashon kresiente. For di e tempu ei ta optené awa di bebe na Boneiru for di awa di laman.
Hidden
Hidden
Produkshon duradero
Na prinsipio produkshon di awa di bebe for di awa di laman tabata sosodé na Boneiru ku vaporadónan. Esaki ta un proseso di destilashon ku temperatura haltu: ta herebé e awa di laman te ora sali damp. Ora e damp fria ta haña awa puru. Loke ta sobra ta awa kayente ku un konsentrashon haltu di salu. E awa kayente aki ku tabata ser bashá den laman, a resultá di ta dañino pa bida marina.
Osmósis reverso
Danki na binimentu di e téknika di ‘osmósis reverso, produkshon di awa na Boneiru a bira muchu mas duradero. Ku ‘osmósis reverso’ ta pèrs awa di laman bou di preshon haltu pasa den un membrana. E membrana ta filtra tur e supstansianan ku ta sobra for di e awa. Seguidamente e awa ta pasa dor di un di membrana. Di e manera aki e ta bira ekstremamente puru, ku un kantidat mínimo di salu ku ta sobra (5-10 mg/l).
Ku osmósis reverso no ta basha awa kayente den laman. Ademas e instalashon tin mester di ménos espasio i uso di energia ta mas abou.
Tratamentu i distribushon
E téknika di osmósis reverso ku kua ta produsí awa di bebe na WEB, ta entregá awa ekstremamente puru. E awa aki ainda no ta pa bebe. E awa aki mester di un tratamentu pa asina por kumpli ku eksigensianan legal pa awa di bebe. Asina e mester kontené mineralnan, entre otro un sierto kantidat di kalki.
Tratamentu posterior
Via filter di kalki ta disolvé kalsio karbonato den awa. Ku esaki e awa ta bira mas ‘duru’. Pa hendenan ku un mashin di laba tayó: e awa tin un ‘dures’ total di mas o ménos 50 mg/l òf 2.8 grado Aleman di ‘duresa’. Ku esaki e awa ketu bai ta suave i kasi lo no depositá kalki. Tambe ta agregá CO2. Esaki ta funshoná manera un katalisador pa disolvé e kalsio karbonato.
Na Boneiru no ta agregá fluoride na e awa di bebe. For di 1973 fluorisashon no ta un eksigensia legal mas den Regulashon Hulandes.
Distribushon
Despues di e tratamentu ta almasená e awa den tankinan di e Planta di Tratamentu di Awa di bebe na Hato. Despues di esaki ta pòmp e pa e tankinan di distribushon na Seru Largu, Sabadeco i Subi Rincon. For di einan e ta bai via e ret di distribushon di awa pa bo kranchi prinsipal. Pa motibu ku e tankinan di distribushon ta riba seru, ta sòru pa sufisiente preshon di awa.
Kalidat
Un suministro di awa seif ta importante pa habitantenan i bishitantenan di Boneiru. WEB tin su propio laboratorio ku ta kontrolá e kalidat di awa di bebe kontinuamente.
Dos biaha pa siman e laboratorio ta kwe mònster na e tanki di almasenahe na Hato i e tankinan di distribushon na Seru Largu, Sabadeco i Subi Rincon. 34 punto pa kwe mònster repartí riba henter e isla, a ser indiká den e ret di distribushon di awa. Ta kwe mònster na e puntonan aki dos biaha pa siman riba diferente parameter.
E laboratorio di WEB ta tèst e awa riba konstelashon kímiko, koló, kon trubel e ta, bakteria i smak. Si topa desviashon den kalidat di e awa, WEB ta tuma medida mesora i si ta nesesario ta spula e pipanan konserní.
Regularmente WEB ta den konsulta ku IL&T (Inspectie Leefomgeving & Transport, Inspekshon Medio Ambiente & Transporte). Esaki ta parti di Ministerio di Infrastruktura i Awa. IL&T ta responsabel pa kòntròl riba maneho di awa di bebe seif i korekto.
Legionela
Den kuido pa awa di bebe ta seif, legionela tin e atenshon spesial di WEB. Informashon di legionela, tokante nos maneho i prevenshon bo por download aki (pdf).
Sosionan
WEB a inogura e planta nobo ofisialmente dia 28 di oktober di 2021. WEB a tuma e produkshon di 7.200 m3 pa dia di awa di bebe na su enkargo.
For di 2015 WEB ya tabata tin un produkshon propio di 1.600 m3 pa dia. Danki na un posishon sólido WEB por ehekutá e produkshon di awa di bebe kompleto independientemente.
Den kolaborashon ku Royal HaskoningDHV for di kuminsamentu di 2019 WEB ta traha riba desaroyo, diseño i realisashon di e Planta pa Tratamentu di Awa di bebe nobo (Drink Water Treatment Plant, DWTP). Den un kontratashon di 2020 a skohe pa un instalashon di IDE Technologies di Israël.
Komo suministradó WEB ta responsabel pa awa di bebe di bon kalidat na Boneiru. WEB ta traha den un kolaborashon estrecho ku e kompania di awa Hulandes Vitens Evides International (VEI), ku ta pone konosementu i ekspertisia na disposishon pa optimalisashon di e suministro di awa na Boneiru.
Proyektonan
Awa di bebe ta un di e produktonan di promé nesesidat di un ser humano. Na Boneiru poblashon ta krese i turismo ta un pilá ekonómiko importante. Invershon den suministro di awa di bebe ta un proseso kontinuo. Solamente di e manera akí WEB por garantisá entrega di awa konfiabel i di sufisiente kalidat na tur e konsumidónan riba nos isla.
Hidden
Hidden
Rumbo pa produkshon independiente di awa di bebe
Periodo: 2015 – presente
27 di òktober 2015 na DWTP na Hato un unidat nobo di osmósis reverso a drenta den servisio. Ku esaki WEB pa propio kuenta ta produsí 1.600 m3 awa di bebe pa dia. Esaki a trese e kapasidat di produkshon total di Boneiru na 5.600 m3 pa dia.
E produkshon dor di GE-Suez di 4.000 m3 pa dia den e di tres seméstro di 2021 gradualmente lo ser finalisá. WEB e ora ei lo produsí 7.200 m3 awa di bebe pa dia. Henter e liña di produkshon ta konsistí di modulo. Esaki ta hasi posibel pa realisá mantenshon sin interupshon di produkshon.
Tuberia nobo pa distribushon di awa di bebe
Periodo: 2014 -2021
Pa motibu di kresementu di poblashon i oumento di aktividat ekonómiko, e demanda pa awa di bebe na Boneiru ta krese. WEB ta invertí pa e depósito di awa i kapasidat di transporte krese konhuntamente na un manera responsabel i duradero. Esaki nos ta hasi dor di monitoreá i i manehá e ret di distibushon kontinuamente. Dor di esaki WEB tin bon bista riba e tuberia ku mester ser saneá i reforsá.
Na 2014 a kuminsá ku e instalashon di un tuberia nobo pa transportá mas awa di DWTP di Hato pa e tankinan di depósito na Seru Largu. Pa por garantisá mas siguridat di suministro, a skohe pa instalá un tuberia di transporte nobo prinsipal di Seru Largu pa Kaya Maria Carmen Helmund.
Tuberia Hato-Seru Largu
E tuberia di pèrs nobo di Seru Largu tin un diameter (DN250, tabata DN200) mas grandi. Tambe a instalá reguladónan di frekuensia (VFD) riba e motornan elèktriko di e pòmpnan di transporte. E medidanan aki ta baha e uso di energia i ta oumentá efisiensia i konfiabilidat di e suministro di awa di bebe na Boneiru.
Despues di un destaho e instalashon di e tuberia aki, ku ta konserní un distansha di 2 kilometer, a ser ehekutá dor di Bonaire Wegenbouw Maatschappij (BWM).
Tuberia Seru Largu – Kaya Maria Carmen Helmund
E tuberia di transporte nobo prinsipal, ku un largura di 5.500 meter i un diameter di 355 mm, a ser realisá den HDPE klase di drùk PN 10. E tuberia aki ta garantisá e siguridat di suministro i kalidat di e awa di bebe den un gran parti di e ret di distribushon sentral i suit di WEB.
Via un destaho a duna e trabou na Curaçaose Wegenbouw Maatschappij (CWM) i a 2015 a serfinalisá na 2015.
Depósito di awa di bebe nobo na Seru Largu
Periodo: 2020 – 2021
Ta tarea di WEB pa sòru di tin sufisiente awa di bebe almasená na Boneiru. Pa motibu di kresementu di poblashon i oumento di turismo ta nesesario pa oumentá e kapasidat di depósito pa awa di bebe.
Na Seru Largu un tanki di depósito èkstra ta ser konstruí ku un kapasidat di 5.000 m3. Ku esaki WEB ampliamente ta kumpli ku e eksigensianan.
Via un destaho e trabou a ser duná na Florida Aquastore. E konstrukshon lo tuma lugá den e di dos trimèster di 2021. Den e di 3 trimèster di 2021 e tanki di depósito lo drenta den servisio. E kapasidat total di depósito riba e isla ku esaki lo ta 25.500 m3.
Inspekshon i Revishon depósito di awa di bebe
Periodo: 2019 – 2024
Den transkurso di sinku aña WEB ta realisá un inspekshon i revishon di tur depósito di awa pa bebe riba e isla. Kada tanki ta ser evaluá i balorá a base di rapòrtnan i konforme e eksigensianan vigente. Despues ku registrá lokual ku mester hasi na kada deposito den un plan di proyekto, e revishon ta keda realisá.
E revishon di e promé dos tankinan na e lokalidat di WEB Hato, a ser ehekutá. Den e di 3 trimèster di 2021 lo kuminsá ku e revishon di e depósito di awa di bebe 1 na Seru Largu.
