Tokante nos
A funda Water- en Energiebedrijf Bonaire N.V. (WEB) na 1963 i e ta propiedat di Entidat Públiko Boneiru. WEB ta responsabel pa entrega di awa di bebe i koriente duradero, konfiabel i pagabel. Nos ta traha pa mas ku 20.000 kas, kompania i organisashon riba e isla.
Boneiru ta desaroyá su mes lihé. E poblashon ta kresiendo, turismo ta desaroyando su mes. WEB ta invertí hopi pa tene e suministro di koriente i awa riba un nivel apropiá. Esei ta nifiká tambe: kontribuí na desaroyo duradero di nos isla.
Pesei WEB ta invertí den ‘koriente bèrdè’: energia for di fuentenan renobabel, manera bientu, solo i alga, ku uso di e mihó teknologia. Tambe WEB a ekspandé su servisio ku e kolekshon i purifikashon di awa di berpùt i entrega di awa di irigashon. Na 2021 WEB mes ta bai produsí awa di bebe.
E tim di WEB ta konta aktualmente ku un total di 146 trahadó. Nan ta traha huntu pa ku e kompania di awa i elektrisidat di i pa e komunidat di Boneiru bou di e lema ‘Let’s do it together’.
Hidden
Hidden
Mishon
WEB ta kontribuí na salubridat públiko, e kapasidat di Boneiru pa para riba su mes pia i un nivel di bida haltu na isla aki. Esei nos ta hasi ku suministro di awa di bebe i koriente konfiabel, duradero i pagabel i ku prosesamentu di awa di berpùt.
Hidden
Hidden
Balornan fundamental
Balornan fundamental ta un parti importante di e kultura di kompania na WEB. Nan ta e puntonan di bista den nos maneho di empresa i den e komportashon di nos trahadónan. Nos balornan fundamental ta:
- Komunikashon habrí i honesto
Bisa loke bo ke bisa. Pero tené profeshonal, no papia malu di otro i no hasi redu. - Rekonosementu i apresio
Trata un otro persona manera bo ke ke pa nan tratá bo. Duna otro atenshon. Mustra apresio pa otro. - Responsabilidat
Bisa loke bo ta hasi i hasi loke bo ta bisa. Tuma bo mes responsabilidat. No laga un otro persona solushoná bo problema. - Krese huntu, desaroyá huntu
Apoyá otro den kresementu i desaroyo. Kompartí informashon i konosementu. Huntu nos ta yega mas leu. - Kliente promé
Klientenan no tei pa nos, nos tei pa klientenan, internamente i eksternamente. - Ekselensia
Traha ku pashon, dedikashon i konvikshon pa trese WEB i e klientenan mas leu.
Organisashon
WEB ta di i pa e komunidat Boneriano. Komo N.V. di Gobièrnu WEB ta raportá direktamente na Entidat Públiko Boneiru. Gerensia di WEB ta konsistí di 3 persona. Un Hunta di Komisario di sinku miembro ta supervisá gerensia.
Gerensia:
Raymond Silberie,CEO
Joanne Balentien-Nicastia, CFO
Gerrit Scharrenberg, COO
Hunta di Komisario:
Sr. G.A. de Haan ( Presidente hunta di komisario)
Sr. A.G.G Stacie
Sra. E.G. Martijn
E tim di WEB ta konsistí di 163 trahadó.
Pa por garantisá servisio moderno, konfiabel i duradero, WEB mester invertí den suministronan riba e isla. P’esei efisiensia i ganashi ta indespensabel, kaminda ku ganashi riba su mes no ta un meta pa nos.
Bon Gobernashon
Komunidat di Boneiru mester por konfia riba un maneho di WEB konfiabel i serio. Nos guia pa esaki ta ‘Kódigo di Bon Gobernashon Teritorio Insular di Boneiru’.
E kódigo ta duna norma pa entre otro struktura di organisashon, statuto, bon maneho, supervishon, transparensia, responsabilisashon eksterno i kontròl finansiero.
Download aki Kódigo di Bon Gobernashon Teritorio Insular di Bonaire.
Relato anual
Un vershon konsiso di nos relato anual 20201 bo por download aki.
Bo ta deseá di tira un bista den nos relato anual kompleto? E ora ei entregá un petishon por eskrito. Manda bo petishon via un karta na Kaya Gresia #6 òf via meil na info@webbonaire.com
Historia
Ya pa mas ku 58 aña WEB ta traha pa komunidat Boneriano. Lesa aki e puntonan kulminante den nos historia!
1955
Overzeese Gas- en Elektriciteitsmaatschappij (OGEM) ta kuminsá ku su aktividatnan na Boneiru.
1963
Ta lanta Dienst Water Distributie (DWD).
1978
DWD i OGEM ta sigui huntu bou di un nòmber nobo: Water- en Energiebedrijf Bonaire N.V.
1998
Produkshon di awa di bebe na Boneiru – e planta di awa na Hato – ta pasa pa ‘osmósis inverso. E teknologia aki a desaroyá medio añanan ’90. Ta pèrs awa di laman bou di preshon haltu dor di e membranonan ku ta wanta salu i mineral. Promé ku e tempu ei tabata desalá awa di laman via kalentashon i evaporashon. Den esaki awa di berpùt kayente ku konsentrashon haltu di salu, tabata sali liber. Osmósis inverso ta mas duradero i mas efisiente.
2007
WEB ta hasi un prueba ku elektrisidat ‘prepago’ na 35 kas den e bario di Amboina, kual su resultado tabata éksitoso. Paga adelantá ku e oportunidat di por kontrolá uso di koriente presis, ta algu ku ta ta atrae hopi hende. Entretantu ta imposibel pa imagina Boneiru sin ‘Pagabon’.
2009
WEB ta haña koriente ‘bèrdè’ di e parke di energia di bientu na Morotin. Ecopower a konstruí e parke aki. Na 2013 ContourGlobal Bonaire, sosio di WEB den produkshon di elektrisidat a tuma e parke di energia di bientu over.
2013
A konstruí e promé instalashon di purifikashon di awa di kloaka (AWZI) na Boneiru. E instalashon na Kaminda di Lagun ta purifiká awa di kloaka ku ta bini di berpùt i tanki séptiko. WEB ta responsabel pa eksplotashon.
WEB ta un di e promé kompanianan na Boneiru ku ta sera un kombenio ku e bònt di konsumidó UNKOBON (Union di Konsumidó Bonaire).
2014
WEB ta eksplotá e di dos instalashon di purifikashon di awa di kloaka na Kaminda Lagun. E instalashon di purifikashon di awa di kloaka (RWZI) aki ta parti di Bonaire Sewerage & Sanitation System (BSSS) na e área di kosta di Kralendijk. E sistema di kloaka aki ta traha riba un téknika di vaküm avansá.
Ta ekstendé e planta di awa na Hato ku un unidat di produkshon nobo. Ku esaki ta hisa e kapasidat di awa di bebe na 4800 m3 pa dia. E uso na aña 2014 tabata aproksimadamente 4.400 m3 pa dia.
Despues di 28 aña ta ta rediseñá e logo di WEB. E logo, identidat korporativo i wèpsait nobo ta ser presentá na trahadónan, sosionan di kolaborashon i públiko di un manera festivo.
2015
Riba enkargo di WEB, Piloto Solar Barcadera ta kuminsá. E ta un instalashon di prueba di 792 pènel solar. Ku e piloto aki WEB ta investigá rendimentu i efekto di un instalashon sentral pa energia solar riba e ret di elektrisidat.
Ta bolbe konstruí un unidat di desalinisashon na Hato. Ku esaki WEB ta produsí riba su mes 1.600 m3 di awa di bebe pa dia. E kapasidat di produkshon total ta yega ku esei na 5.600 m3 pa dia. E kontratonan ku e sosio Amerikano di WEB GE Suez lo terminá den 2019. Pa e motibu aki WEB ta trese e produkshon di awa di bebe paso a paso den propio maneho.
WEB su servisio di interupshon ya tabata 24 ora pa dia, 7 dia pa siman alkansabel. Hasiendo e number di telefòn 9215 grátis WEB ta ekspandé su servisio na klientenan.
2016
WEB i instituto di konosementu TNO Caribbean ta firma un akuerdo marko pa sosten tékniko i ekonómiko pa ekspanshon di e kapasidat di produkshon di elektrisidat.
Riba 1 di yüli e lei nobo Wet Elektriciteit en Drinkwater BES (Lei di Elektrisidat i Awa di Bebe BES) a drenta na vigor. E lei ta regulá diferente aspekto di e produkshon i distribushon di elektrisidat i awa na Boneiru.
E legisladó a apuntá Autoriteit Consument & Markt (ACM)/ Outoridat Konsumidó & Merkado pa kalkulá e tarifanan, komo supervisor independiente.
2017
WEB ta konkluí e Masterplan Awa i e Masterplan Elektrisidat 2017-2030. Den e plannan aki a kalkulá kiko mester pa sigui e desaroyo rápido i e kresementu ekonómiko di Boneiru.
WEB te establesé e business unit Major Projects pa kordinashon di proyektonan grandi stratégiko pa e suministro di awa i elekstrisidat i purifikashon di awa di kloaka na Boneiru.
Na Boneiru tin un interés grandi pa instalashon propio di pènel solar. Esaki ta eksigí un kolaborashon intensivo ku e habitantenan i e kompanianan. WEB mester por keda garantisá e seguridat i stabilidat di e ret di elektrisidat. Pesei e instalashonnan di pènel solar mester ta registrá. Si petishon, instalashon i inspekshon a keda pasá eksitosamente, WEB i e kliente ta sera un akuerdo ku tambe ta enserá suministro bèk di e koriente produsí na e ret.
2018
Boneiru ta risibí un sistema di tarifa pa awa i elektrisidat kompletamente nobo. E sistema nobo konosé tarifa fiho pa awa i elektrisidat; e montante ta ser stipulá a base di e kapasidat di konekshon. Banda di esei tambe tin un tarifa ku ta varia, basá riba uso.
2019
WEB ta realisá e di 10.000 konekshon pa awa.
Ta ekspandé e sentral di energia híbrido na Karpata ku 5 djènereiter di disel. Bateria i inverter a ser renobá i e sentral tin un sistema di maneho di energia avansá. Pesei e enegia di djènereiter, turbina di bientu i bateria por ser usá efisientemente. Ku esaki e sentral ta alkansá un kapasidat di 10 MW.
Ta hinka e promé skòp den tera na un manera seremonial pa e segundo planta di awa na Hato. E instalashon nobo di osmósis inverso ta hiba Boneiru un paso mas serka na e produkshon di su propio awa di bebe. E planta di awa nobo (entrega previsto yüli 2021) ta kalkulá riba 6.400 m3 awa di bebe pa dia, ku opshon di ekstenshon/ampliashon te ku 7.200 m3.
2020
Ta ekspandé e sistema di kloaka vaküm na e área di kosta di Kralendijk. Na Belnem lo bini un di dos stashòn di vaküm ku ta hasi konekshon di 173 kas nobo posibel. Ta reforsá e infastruktura di vaküm na Hato i 45 konekshon di kas nobo ta keda realisá.
E pandemia di COVID-19 tambe a afektá Boneiru. E trabounan di WEB ta sigui teniendo kuenta ku e plan di kalamidat di e Outbreak Management Team (OMT) di Entidat Públiko Boneiru.
